Sepertiga Akhir Ramadhan

Akhir Romadlon 1431H
Jam 08.00 Waktu Indonesia Bagian Njeblog.

Kyai Segawon mangkat nang sawah mampir warung, ketemu Saleh, tonggone Kyai Segawon sing ora poso lagi ngopi nang warung iku, sok ngalim Kyai Segawon takon,"Sampean ora poso to kang?". Saleh njawab,"Yo poso to Mbah...aku yo wong islam kok". Kyai Segawon takon maneh,"Lha iku kok malah ngopi wis yah mene?". Saleh ora kalah semaur,"Lha piye to Mbah, jaremu mambengi pas kultum, mengakhirkan saur kan entuk pahala to? Lha iki aku yo lagi mengakhirkan saur Lo, hehehe...Sampean dewe nyapo kok nyang warung yen sampean poso?". Kyai Segawon puter kepala,eh puter otak maksude,"Anu leh..anu..aku maeng arep tuku korek ngge ngebong damen nang sawah." Cepet-cepet Kyai Segawon metu ko warung.

Nang ngarep warung ono truk ngusung pasir mandek, ora ngertio sopire ternyata Parmin yo tonggone Kyai Segawon. Kyai Segawon merasa bertanggung jawab atas umate banjur takon "Ora poso to min? arep nyapo kok mampir warung?". enteng wae Parmin njawab."Musafir Mbah...entuk keringanan entuk yen ora poso to mbah?". Kyai Segawon mung gedek-gedek, cepet-cepet ngaleh wis ora betah...

Teko sawah Kyai Segawon ndodok nang pinggir galengan banjur merenung," Ndunyo bener-bener arep kiamat iki, wis akeh umat sing lali marang karo kewajiban, Lali perintahe Gusti kang Kuoso. Ojo maneh diajak perang jihad fi sabilillah ngrewangi sedulur nang palestina, merangi howo nafsune dewe wae wis ora sanggup."

Kyai segawon terus mikirake prihatin kepriye nasibe umat iki mbesok nang akherat, panase geni neroko wes ora sabar bakalan ngobong...opo,geni? ngobong? ujug-ujug Kyai Segawon jenggirat tangi cepet-cepet ngadek lan ngrogoh kantonge, Rokok Surya sak uthil lan korek ditok'ake songko kantonge, banjur diakep ing lambe trus disumet rokok mau, disedot bulek'e lan di tok'ake maneh. ternyata Kyai Segawon ing warung mau cepet-cepet ngaleh mergo wis ora betah arep ngrokok. Nikmate bulek rokok wis nglaleake segawon kang kyai koyo opo panase geni neroko.